Agenda 21

Ikastetxearen iraunkortasunerako eta kalitaterako hezkuntza-programa bat da. Komunitatearen partaidetzan oinarritzen da, eta udalerriko garapen iraunkorrean esku hartu eta laguntzen du.

Ingurumen-hezkuntza programa bat denez, ingurumen-arazoen konponbidean parte hartzeko ezaguera, gaitasuna, jarrera, motibazioa eta konpromisoa garatzea da haren xede nagusia.

Bere ezaugarri garrantzizkoenak hauexek dira:

• Bi eremu lantzen ditu, eskola eta udalerria edo eskualdea.
• Hezkuntza-komunitatearen partaidetza du ardatz eta oinarri, eta ikasleen protagonismoa bilatzen du.
• Kudeaketa arduratsu eta iraunkorra sustatzen du.
• Curriculum-berrikuntza eragiten du.
  
  

Gure institutuan betidanik izan ditugu ingurua zaintzeko gogoa eta bultzada; hori dela eta Agenda 21 proiektuan parte hartzea erabaki dugu ikasturte honetatik aurrera.

Proiektu horretan gaudenok garapen jasangarria bultzatzen dugu. Barakaldoko ikastetxe gehienak lanean egongo gara udaletxearekin batera. Institutuan Ingurumen Batzordea ikasturtero osatuko dugu: ikasleak, irakasleok eta lankideak. Batzorde horretan institutuko diagnostikoa egingo dugu, gure ingurumena hobea izan dadin borobildu ahal diren gauzak aztertzeko, ingurumenari lotutako txangoak antolatuko ditugu eta beste gauza eta ekintza asko aurrera eramango ditugu, beste batzuen artean.

Institutuan urte asko daramagu papera, idazketa-tresnak, inprimagailuen kartutxoak eta pilak birziklatzen. Aurreko ikasturtean edukiontzi laranja bat eskuratu genuen olioa birziklatzeko.